Samræður hafnar við stjórnvöld

Skýrsla um áhrif COVID-19 á íslenskan tónlistariðnað sem kom út í sumar gefur góða mynd af stöðu tónlistariðnaðarins í dag. Skýrslan fjallar um áhrif samkomubanns og ferðatakmarkana á tónlistarfólk en einnig á þann fjölbreytta hóp sem starfar innan iðnaðarins, allt frá tæknifólki til tónleikastaða og tónlistarhátíða.

Í júlí virtist vera farið að sjást aðeins til sólar en það reyndist skammgóður vermir og í kjölfar nýjustu sóttvarnarreglna er ljóst að aftur verði höggið stórt fyrir tónlistariðaðinn.

Í skýrslunni voru lagðar fram tillögur að aðgerðum með það að markmiði að lina höggið og styðja við tónlistariðnaðinn á þessum erfiðu tímum. Í framhaldinu hófst samtal með hinu opinbera og er skýrslugerðarhópurinn bjartsýnn eftir góðan fund með Mennta- og menningarmálaráðherra í síðustu viku.

Á myndinni má sjá hluta starfshóps skýrslunnar að störfum en á myndina vantar Eið Arnarsson og Gunnar Guðmundsson. Hópurinn vinnur nú að eftirfylgni með tillögunum og hittist reglulega.

Ásmundur Jónsson frá SFH, Guðrún Björk Bjarnadóttir frá STEFi, Bryndís Jónatansdóttir frá ÚTÓN, Sigtryggur Baldursson frá ÚTÓN, María Rut Reynisdóttir frá Tónlistarborginni Reykjavík og Gunnar Hrafnsson frá FÍH.